طريقة عمل الحمام المغربى

النهارده بقي اهاديكم هديه الجواز لكل عروسه

وبجد مش عاوزه منكم رد للهديه دي غيرانكم تدعوا لي ان ربنا ييسرلي اموري ويعجل لي بالخير ان شاء الله

بصوا بقى مبدئيا اختاري الوقت الصح لعمل الحمام المغربي

يعني مش وقت البيت كله بيطلب فيه استعمال الحمام مطلوب الروقان

  

هنقول الاول كل المطلوب بالاسعار والصور ومنين 

اولا الادوات المطلوبه

الليفه المغربي

ده شكلها

وفي منها اللي عامل زي الكف

سعرها ب20 – 25 جنيه وفي نوع ب 9 جنيه وبرده شغاله كويس المهم تكون اصليه

فايدتها

دي مش زي اي ليفه عاديه ..دي وظيفتها تشيل الجلد الميت اللي ملوش لازمه بمنتهي الهدوء وبدون ماتسبب التهابات ولا اي مشاكل وفيها ميزه جامده جدا لو تم الانتظام عليها فهي هتعمل تقشير للبشره والتقشير ده اوعدكم انه هيشيل الحبوب بتاعت الضهر واللي علي الرجل من فوق واللي بتطلع بعد السويت والشعر اللي بينبت في الجلد ومش بيطلع علي السطح

تمام كده يابنات خليكوا معايا واحده واحده

الصابون المغربي

ده شكله

وفي منه السايب وفي اكياس اصغر مجربتهاش الحقيقه انا بقول اللي جربته بس

وسعره 25 – 30

ده بقي الباسورد بتاعت النضافه من غيره الليفه مش هتديكي النتيجه المرجوه ليه بقي؟؟

عشان الصابون ده فيه كل مايمكن انه يفيد بشرتك ويطريها وينعمها ويفتح لونها وينقيها كمان

فله فله يعني

ماء ورد

طبعا كلنا عارفين شكله ايه وزياده تاكيد

اهوه

وسعره بيختلف من نوع للتاني بس النوع بتاع لونا من الصيدليه ب7جنيه ونص

فايده معروفه طبعا

بس للي ماتعرفش بينور بشرتك ويورد لونك كده وتونك ممتاز للبشره

ليمونه

عشبه الداد

دي صورتها

ونخلي بالنا اوي من العشبه دي

العشبه دي بتفتح كل الاماكن السمرا في جسمك بس تتعاملي معاها بحذر وزي ماهقولكم بالظبط ومش عاوزه افتكاسات

سعرها الربع كيلو ب25 - 30 جنيه

الطمي المغربي

ده شكله

وانا بجيبه سايب من عند العطارالربع كيلو ب 25 جنيه واوقات ب20

مهم موووووووووووت هيتوغل في بشرتك ويشيل الشوائب ويعقم جلدك ويخلي بشرتك حرير والاستمرار هيفتح اللون برده

شوفي كم حاجه بتفتح اللون في الحمام ده

حجر للكعوب

شكله اهوه وب 5 جنيه فقط

ماااعتقدش في حد مش عارفه فايدته ايه

واستنوا بقي معايا

بخصوص الكعوب دي هقولكم علي حركه تهووووووووووووووووووس تخلي كعب رجلك احمر ويجنن

الخطوات بقي يا عرايس 

خلاص بقي جبنا كل حاجه وكل تمام وداخلين علي الشاور التمام

1 – بصي ياعروسه منك ليها بقي

عندك اختيارين لو عندك بانيو هتمليه بميه سخنه علي قد ماربنا يقدرك ووتكوني قافله الشبابيك كويس عشان يبقي الحمام مليان بخار والدنيا حواليكي مشبره اوي واتنقعي فيه بتاع ربع ساعه علي الاقل لو تقدري اكتر وماله مايضرش

معندكيش يبقي تقفي زي الشطوره تحت الدوش 10 دقايق ميه سخنه وياريت قبل متدخلي تحت الميه تفتحي الدش قبل الحمام بشويه عشان البخار

اكرر البخار اهم حاجه والميه لازم تكون اسخن حاجه جسمك يقدر يتحملها

* ملاحظه مهمه تاني :

انقعي الليفه المغربي لو هتستعمليها لاول مره في ميه سخنه مغليه لمده نص ساعه هي والحجر بتاع الرجلين

هاتي طبق وفيه ميه سخنه مغليه وحطي الاتنين فيها نص ساعه

2 – قومي بقي ياقمر فضي البانيو بتاعك واقعدي علي الحرف بتاع البانيو وادهني جسمك بالصابون المغربي دهان هيبقي لزج وشكله عامله زي العسل الاسود كده مش سايل اوي يعني بس لزج وخليه يغطي جسمك كله

3 – سيبيه علي جسمك من 20 – 30 دقيقه والله كل ماتفضلي اكتر طلع نتيجه اكبر

بصي بقي اعملي حسابك الحمام ده علي الاقل بياخد بتاع ساعه ونص هاتي معاكي مجله عشان مش تزهقي من القعده بس النتيجه تستاهل الانتظار وهتبقي مدمنه وتكرريه كل يومين تلاته والله وعن تجربه

بص ياقمر منك ليها

وانتي قاعده بتستني انتهزي الفرصه واعملي لشعرك حمام كريم

ولما تخلصي تدليك فروه راسك (طبعا من غير ماتخلي الميه تزحلق الصابون ياحلوه)

انزلي بقي بالحجر علي كعوب رجليك واديهاااااااااااا

افركي فيها لحد ماتشيلى كل الجلد اليمت ..خلاص خلصتيها تمام

بصي علي الساعه ..فاتت النص ساعه

4- قومي اشطفي جسمك بالميه السخنه كووووووووووويس اوي وشيلي بايديكي كل اثار الصابوووووون تماما بايديكي موش الليفه

5 – دوقتي بقي طلعي الليفه من الطبق اللي كنتي ناقعاها فيه والبسيها في ايدك ودلكي جسمك دواير دواير الاول بضغط خفيفه وبعدها ذودي الضغط علي قد ماتقدري

ماتستعجليش ،،، بعد خمس دقايق بس من التدليك الجلد الميت هيبتدي يقع قدامك علي الارض

دلكي وادعكي بانتقام كل الاماكن السودا او الغامقه

الركب – الكعوب – الكوع - مفاصل الرجل

واتعاملي بحذر بالغ في المناطق الحساسه او للي جلدها رقيق

بصي لو عندك بقي حبوب في اعلي الفخد او اعلي الضهر دلكيها بضغط متوسط

6– اشطفي جسمك كويس بالميه هتلاقي جلدك بيلمع من النضافه ياعروسه 

7 – بسرعه هاتي طبق صغنن حطي فيه معلقيتن من عشبه الداد

بس خلي بالك العشبه دي ماينفعش تتحط علي الوش ولاتقربيها من نفسك خاااااااااااالص

المهم تحطي معلقتين منها في طبق وعليه نص لمونه وتحطي عليهم ميه ورد وتعجنيها عجينه نص سايله وحطيها علي جسمك 5 دقايق بالعدد وخصوصااااااااااا الاماكن الغامقه منه

8 – اشطفي جسمك تاني

9 – معلش عارفه انك زهقتي بس النتيجه والله تستاهل التعب وكله يهون من اجل جسم بلاشوائب ولاعيوب ولاايه؟؟؟؟؟؟

هاتي طبق تاني وحطي فيه 3 معلقه كبيره طمي مغربي واعجنيه بميه ورد ونص اللمونه التاني لحد ماتبقي عجينه الي حد ماسائله برده ووزعيها علي جسمك كله وانتظري 10 دقايق المره دي

10 – اشطفي جسمك حلو اوي المره دي بميه دافيه مش سخنه

11 – ياريت لو تحضري ازازه بلاستيك من بتوع الجلانس لو عندك واملي نصها ميه ورد ووربع كوبايه ميه عاديه ونقطتين زيت ورد او زيت ياسمين او زيت لافندر

الازازه ب 5 جنيه وتحطي نقطتنين بس مش اكتر

ورشيها علي جسمك واستني دقيقه ينشف ونشفي جسمك واطلعي ياعروسه

12- الفااااااااااااينل بتاعتنا بقي

هاتي ازازه زيت بيبي جونسون وكم نقطه في ايديكي ودلكي جسمك عشان الترطيب

احلي الاسرار بقي

عارفه دم الغزال اللي بيتباع عند العطاراللي شكله كده

اه اللي بيعجنوا بيه الحنه .هاتي منه ب2 جنيه بس وهاتي علبه فاضيه بتاعت كريم مرطب وليكن ايفا بالخيار عشان الجسم بيمتصه بسهوله وحطي علي العلبه (هاتي اصغر حجم ) مقدار راس كبريت بالظبط من دم الغزال واخلطي الاتنين ببعض هتلاقي الكريم بقي لونه بينك غامق شويه ودلكي بيه ياقمر كعوب رجليكى وياسلام لو تلبسي بقي عليها شراب لحد ا لصبح

هتصحي تلاقي كعوبك حمرا اسبووووووووووووووووع

وماتنسيش تدعيلى